احتاجكم جدا جدا ومره احتاج ردودكم عشان اتطمن ..

السلامـ عليكمـ ورحمة الله وبركاتهـ ..

كيف الجميع ؟! ان شاء الله بخير وصحه وعافيه يارب

اوكـ ماحطول بالكلام بس عندي استفسارات كثير اتمنى بجد احد يريحني ويجاوبني عليها اذا تكرمتو

حاليا ادرس بالجامعه في كلية التربيه قسم فيزيا اول سنه بالتخصص بعد التحضيري " النكبه "

المهم انا فكرت احول ع البترجي بالصيف لكن حصل رفض من الوالد وقدر الله وماشاء فعل

ومع الفيزيا ولسا بالترم الاول بتجيني عقده نفسيه صراحه مره القسم شي يجيب العصبي والقلق وكل شي

وانا امنيتي ادرس العلاج الطبيعي مادري ودي اعرف ايش يندرس فيه قرات عنو وعن خطتو الدراسيه بالجامعه المهم اني استهويت القسم وحبيتو جدا

عندي مشكله انو فيه تشريح بس مستعده اضغط على نفسي عشان ادرسو .. وحصلت امور من الكليه واجتماعات انو ممنوعين من التحويل لاي تخصص طبي بالجامعه طبعا حسيت كل الابواب انقفلت بوجهي

وكلو سببهم عشان سنة التحضيري الي درسناها بالكليه كانت عربي !! وكذبو علينا انو انضمينا للجامعه وهيا الكليه السنه دي الي انضمت

يعني تخيلو الظلم الي حطونا فيه ! بنات و اولاد قدي بس عشانهم بالجامعه الاقسام كلها مفتوحه لهم من طب وغيرو !!

وانا ودفعتي عشاننا بالكليه بس ممنوعين من تخصصات صحيه ! واي تخصص تاني ممكن نحولو !! وغير كذا الظلم الاكبر انو السنه دي الي بالكليه خلاص تنفتحلهم كللل اقسام الجامعه حتى الطبيه والصحيه !

والله العظيم مره مره مره ماتتصورو قد ايش انقهرت

بعد مده نزل قرار بالجرايد مادري شفتوه ولا ؟

عن انو الملك بيقدم منح دراسيه بالكليات الاهليه , هيا كانت في اول وعارفه

لكن الان الي يحصل على المنحه اقل شي يكون معدلو " جيد " فـ يدخل وينقبل بالمنحه ..

اتصلت اليوم ع كلية البترجي وسألة استاذه اسمها نجوى .. وقلتلها لو اعيد التحضيري متى ابدا ونظام المنح الي بالجرايد اكيد ومنطبق عليكم ولا لا

قالت الا منطبق علينا وتقدمي دحين وتبدي السمستر الجاي الي هوا الترم الثاني

كيف ابدا الترم الثاني تحضيري لو حعيد من التحضيري ؟ حدرس بالضيف كمان ولا حنضغط ولا ايش !

لانو لو كدا انا حأجل واخلي تقديمي ع بداية السنه منها استفيد الترم التاني احسن لغتي الانجلش ..

فـ ابغا احد ينصحني ياجماعه الخير ولا يرشدني لـ شي يخليني ما اكون متردده , انا خايفه مره ادرس العلاج وبعدين ما امشي فيه واكون تعبت اهلي ودفعتهم ع الفاضي

ابغا احد يقولي شي يريح بالي .. ايش اسوي ؟ ودي ادرس العلاج وخايفه من المرتين الي حاولتها ومانفعت يكون اصراري ع القسم مو في صالحي ..

الاسبوع هذا في ناس مداومه لو كنت ابغا اروح اسال ؟ ومتى ممكن اروح يعني الوقت المناسب متى ؟ و كيف تشوفو الدراسه ؟

ومعدل قبولي عشان اتخصص علاج كم ممكن يكون ؟ وهل تشوفو اعيد تحضيري ولا ممكن يعادلو المواد ولا ايش ؟

افتكر اخر مره لما جيت استاذه روعه قالت نشوف معدلك واذا كان طيب تدخلي اختبار اذا عديتي منو تدخلي التخصص واذا ماعديتي تعيدي تحضيري

والاختبار له مبلغ وقدره غير عن الرسوم حق التسجيل وغير رسوم التحضيري وغير رسوم العلاج

يعني بصراحه الكليه جدا جدا جدا جدددددددددددا ماديييييييييه .. لكن الدراسه فيها بعضهم يقولو ممتازه وبعضهم يقولو ضغط بزياده وصعبه ومو قد كدا والبعض يقولو سييييييئه

طبعا مالي بكلام الناس لانو الي بيجس على كلام الناس ماراح يخلص ولا راح يتقدم خطوه

عموما ابغا رايكم ومشورتكم انا في حاجه لارأي كل بنت او ولد يدخلو الموضوع رجائا من كل قلبي اطلبكم لاحد يقرا الكلام ويخرج ردو على الموضوع لاني مرررره محتاجه اراء ودعم وشي يريح بالي وتفكيري

ويخليني ع الاقل استقر نفسيا بالدراسه .. لانو الفيزيا بصراحه ابدا ماودي اكمل فيها

استفساري بالمختصر المفيد :

1- التسجيل لو بديت ترم تاني كيف حخلص كل مواد التحضيري ؟ وهل اقدم ولا افضل السنه الجايه ولو قدمت ع السنه الجايه بيكون نظام المنح الجديد الي نزل مستمر ولا ؟
2- المعدل المطلوب بالعلاج الطبيعي بعد التحضيري لو عدتها ؟
3- رايكم بالدراسه بالبترجي كيف صعبه , سهله ولا كيف هوا مافي شي سهل وكلو يبالو شدة حيل لكن كيف فيها ضغط نفسي مره ولا ؟
4- المواد الي تتاخد بالتحضيري ايش هيا لانو اسمع انو اتغيرت او شي زي كدا !؟
5- الزي عارفه انو اي شي وفوقو اللاب كوت بس سؤال انا اشتري اللاب كوت ولا هما يعطوني هوا ؟ وبسمع عن شعار تحطوه ! شعار ايش ؟ ومن وين اجيبو ؟؟
6- اقدم ع المنحه متى ؟ بعد ما اسجل بالكليه واخلص التحضيري ولا بعد ما اسجل واني قبل لا ابدا اداوم اسجل ولا دحين قبل ما اسجل ولا كيف ؟
7- في احد بالكليه الاسبوع دا لو كنت ابغا اروح شخصيا اسال هناك ؟ ومتى الوقت المناسب الي اروح فيه عشان اسأل ؟
8- الدوامات اغلب شي من متى تبدا لـ متى تنتهي بالدراسه يعني ؟
9- اذا بيتي بعيد وفي عندي اهلي بالصبح يروحو دوامات وممكن ياخرني الشي دا عن الحضور للكليه بدري لو كان الدوام من 8 ايش اسوي !!؟

واسفه جدا ع الاطاله واتمنى كل الي يدخل يرد عليا ويطمني والي يرد يكون متأكد مرررررره من معلوماتو رجائا مره محتاجه ردكم وبسرعه عشان اقرر خلال اليومين عشان احتمال اروح واسجل بس ابغا اتطمن
فـ الي يرد يرد بـ معلومات اكيييييييده بليييييييييييييييز

انتظركم بفارغ الصبر , والله يوفقكم ويسعدكم اجمعين يارب ..

الله يسعدكـ يارب ويدخلك الطب البشري زي ما تتمنى وتتوفق فيه يارب

جدا اشكركـ ..

رحت الكليه في الاسبوع الماضي واستفسرت عن اشياء بسيطه والحمدلله مشي الحال

وحعيد تحضيري من الاول يعني دراستي زيكـ مع بداية السنه الجديده والله يكون في العون

وييسرلنا كل الامور ويسهلها ان شاء الله

وانتا كمان شد حيلك ومافي شي بعيد عن ربنا وان شاء الله كل واحد فينا يدخل القسم الي يباه وكل السنوات منحه كامله

والله يوفق الجميع يارب

اشكرك مره تانيه بجد كلامك جدا ريحني وطمني من اشياء كنت شايله همها الله يفرج همك ويبعد عنك اي ضيقه يارب

يعطيك الف الف عافيه