منتدى طلاب و طالبات كلية البترجى الطبية

منتدى يهتم بكل ما يخص طلاب وطالبات كلية البترجي من مواضيع طبية ومواد دراسية (شخصي)
 
الرئيسيةاليوميةس .و .جبحـثقائمة الاعضاءالمجموعاتالتسجيلدخول

شاطر | 
 

 نظرتِي المبدئية عند زيارتي الأولى لكلية البترجي قبل يومين + استفسار نونو ;)

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
HU~



عدد المساهمات : 5
تاريخ التسجيل : 01/06/2012

مُساهمةموضوع: نظرتِي المبدئية عند زيارتي الأولى لكلية البترجي قبل يومين + استفسار نونو ;)   الجمعة يونيو 01, 2012 11:21 am

السلام عليكم و رحمة الله و بركاته ..
قبل يومين رحت على الكلية و قابت أستاذ أو دكتور (الله أعلم) : أحمد البترجي ..
ورّانا الكلية و كل أقسامها و مشاء الله مرررة حلوة و مرّتبة بس حسيتها فاضية يمكن لأنو كان وقت إختبارات
دخلت أماكن الكلاسات واااو بإختصار + المعامل
كنت أتوقع وجود ساحات رياضية بس تفاجئت إنّو مافي و قالي إنّو عوضاً عن ذلك بيعملوا رحلات سنوياً للبحر و لأماكن مختلفة تغني عن الأنشطة دي
أستغربت إنّو مافي مادة الفيزياء في أول سنة تحضيرية ! .. المواد هي : أحياء - كيمياء - حاسب - رياضيات و إحصاء طبي - أساسيات علم نفس - مبادئ إسعافات أولية - لغة إنجليزية (7) مواد مجملاً .. سألتو عن تغيير المناهج سنة بسنة و كون ماعندهم خطة دراسية ثابتة ؟ قالي إنّو خلاص دي السنة أعتمدو مناهجهم و مارح يغيرونها (دا اللي فهمتوا ماني متأكدة) .. أخذت فكرة شبه إيجابية عن المكان ! و مازلت محتارة هل أسجل في الكلية أو لا

و بالنسبة لإستفساري .. أنا مخيّرة بين كلية البترجي و جامعة الملك عبد العزيز لدراسة الطب ..
و أنا أراهن إنّه الكل راح يقول روحي جامعة الملك عبد العزيز حكومية و الخ .......
الحمدلله أنا نسبتي في الثانوية و القدرات مرة حلوة مبدئياً .. بس ماعتقد إنّي راح أرتاح في جامعة الملك عبد العزيز أول شيء هي بعيدة جداً عن بيتي و كلية البترجي أقرب لبيتي بكثير و هذا الشيء كوني راح أدخل تخصص طب رح يريحني نفسياً و جسدياً .. و غير كدا ماحب الأعداد الكبيرة و المبالغ فيها و الصعوبات اللي كل الناس بيتكلموا عنّها هناك .. كلية البترجي أوكي ممكن تكون ماهي قوية زي جامعة الملك عبد العزيز .. بس تهيء للواحد جو دراسي مريح و جميل أعداد معقولة .. غير كدا قربها من بيتي .. و نجي عند نقطة الإختلاف الدراسة و التدريس ؟

سؤالييييييييي .. يا عالم ريّحوني و قولولي كيف الدراسة و التدريس هناك أنا إن شاء الله رح أشد حيلي سواء هنا أو هناك بس سمعت إنّكم بتواجهوا مشاكل سنوياً بسبب القرارات اللي تنزل عليكم فجأة ..

* ايش هي نوع دي القرارات ؟ هل يقدر الواحد يتكيّف معاها ولا لا ؟
* كيف البنات و الأجواء هناك مريحة و لا شايفين نفسهم عشان دخلوا بفلوسهم =_= " !
*تعامل مجلس شؤون الطلاب ؟
*الأساتذة اللي بيدرسّوا هل هم قد الكفاءة عشان يخرجو من تحت يدهّم أطباء ينشد بهم الوطن ؟ولا لا
هل فيكم أي واحد يقول عن نفسه ايوة أنا من جد طبيب و قد دي الكلمة بإذن الله بعد ماتخرج ولا ياريتني مادرست حاسة نفسي ماني داخلة طب ولا رح أعرف أكون طبيب ! عارفة سؤالي غريب بس تحمّلوني Sad

أسفة على الكلام الطوييييل و أوعدكم لو بإذن الله دخلت و عدّيت السنة الأولى بدون أي مشاكل بإذن الله راح أكتب موضوع مطوّل عن كلية البترجي .. عشان من جد يقهروا الناس اللي بيطلّعوا إشاعات كثيرة و طويلة سواء كان بسبب أو بدون سبب يشتتوا الواحد و يخليه يتجنن .. بس لو تبغو الصراحة في كل مكان فيه الإيجابيات و السلبيات و للأسف مجتمعنا يحب يفصفص كل نقطة في السلبيات و يضخمّها عشان كدا لا تسمعوا من أي أحد ، لو جربتوا و كتبتو فضيحة الجامعة الفلانية .... في جوجل حتطلعلكم بلاوي يعني بإختصار في أي مكان تلاقوا ناس بيذمّوا فيه بدون سبب Smile أو بسبب مواقف صغيرة واجهتهم حكموا على المكان كلّو إنّو سيء .. و السلام عليكم
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
roro



عدد المساهمات : 295
تاريخ التسجيل : 22/09/2010

مُساهمةموضوع: رد: نظرتِي المبدئية عند زيارتي الأولى لكلية البترجي قبل يومين + استفسار نونو ;)   الجمعة يونيو 01, 2012 4:30 pm

اول شئ وعليكم السلام ورحمه الله وبركاته
حياكي الله في كليتنا المتواضعه وطبعا هيا فاضيه عشان اختبار
وتاني شئ محد يتبلى على الكليه بس انا اقولك مساوئها اكتر من منافعها يعني لو جيتي ترقعي بمنافعها ماتقدري بس الي اقدر اقولو ليها مستقبل باهر ان شاء الله

وتاني شئ انا لو كان عندي امكانيه اني اخش عبدالعزيز مافكرت ولا دقيقه في البترجي ومحد راح يجبرك تخشي شئ انتي ماتبيه
وطبعا انتي واعيه وحتختاري الافضل واقوى شهاديا لانو دا المهم

حبيت اعلق على الفيزياء الفيزياء تدرس في سنه اولى ( السنه التحضيريه )وباقي المواد الي قلتيها وزياده عليها عربي ودين واسعافات اولية وعلم نفس طبعا دي السنه جات دي المادتين اما البقيه من اول في وانا اقلك هيا بالعربي ماعندهم خطه درااااااااااااااااااسيه لا للتحضيريه ولا لاي سنه من السنين وازا طلبتيهم يقولولك راجعينا بعدين ويدوكي سيفون اليم يمكن او ان شاء الله يجيبو خطه دراسيه لانو القرارات الي بتجي بتنحط للسنه التحضيريه اكتر شئ مو للدفعات الي قبل

يعني الدراسه عامة في الكليه مرررررررررررررره حلوه بصراحه وانا اشهد بدا الشئ سواء من الدكاتره الالمان ولا المصاريه للمعلومية الالمان يجو 3 اسابيع في الترم ويروحو ويكملو الدكاتره البقيه المحاضرات
بس دا في التخصصات ولكن في السنه التحضيريه مايدرسو المان ابدا

تاني شئ طول السنه يدرسوكي دكاتره وفي الاخير الالمان يحطو الاسئله يعني بالعربي الدراسه في شق والاسئله حقت الاختبارات في شق تاني ودا من مساوئها

من ايجابياتها مكان مريح ماختلفنا دكاتره كويسين الاداره تعاملهم حلو ويتفهمو بس فيهم حركات
وعلى الاعداد الكبيره ابشرك يوم تسجلي حتشوفي اعداد بالهبل الين تكرهي نفسك يعني هنا زي هناك بس الفرق هنا نوص السنه ماتلاقي احد خخخخخخخخ الكل يسحب خخخخخخخخ

ردا لاسالتك
القرارات متنوعة سواء في طريقة الاسئله او مين الي يدرسك او يدخلولك اختبار جديد او طريقة الاختبار ورق ولا اون لاين او اماكنهم او التوفل او اشياء كتيره يعني بس دي من امثلتها
وبصراحه القرارات تنزل في نص السنه مو من يوم نبدا السنه فاطبيعي ماراح تتكيفي معاها وراح تعارضي عليها اصلا
البنات في حبوبين وفي لا في الي شايفين نفسهم وفي الي زي العسل وينحطو على الجرح يبرى يعني في كل مكان الصالح والطالح
تعامل مجلس شون الطالبات والطلاب حلو عامة
والاساتذه والدكاتره بصراحه انا اشهدلهم جدا جدا كويسين صح في الي مو كويسين ودا قليلن بس كا دكاتره وتدريس ماشاء الله حلوين
شوفي حبيبتي مافي احد يكون خش طب وحيقولك انا مني طبيب لو كان فاشل ومكتوب على جبينو l برضو حيقولك انا طبيب انا درست دا الشئ وانا قدو وحكون قدو ان شاء الله

ومافي احد يطلع كلام بدون سبب الا مايكون سرلو موقف وكلنا نعرف انو كلية البترجي في الوجه يعني لو نمله شردت في البترجي حينكتب عنها وحينقال لانو اول شئ جامعه تعتبر جديده واول دفعة اتخرجت السنه الي فاتت ودي السنه الدفعه التانيه يعني ماتقدري تحكمي على الجامعه


بس رايي في الجامعه بصراحه ممتازه ومستقبلنا فيها باهر بس مشكلتها والي من جد مكرهنني فيها انو مافيها نظام ولا خطط دراسيه ولا يقرو على راي
يعني دي الاشياء لو اتزبطتت الكليه حتطلع بيرفكت من جد

ومعليش طولت اتمنى تتقبلي رايي وعلى قولتهم ماراح تقتنعي الا لما تجربي الشي Smile

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
HU~



عدد المساهمات : 5
تاريخ التسجيل : 01/06/2012

مُساهمةموضوع: رد: نظرتِي المبدئية عند زيارتي الأولى لكلية البترجي قبل يومين + استفسار نونو ;)   الثلاثاء يونيو 12, 2012 10:26 am

اهلييين أختي رورو مرررة شكراُ على مساعدتك يعطيكي ألف عافية !!
تبغي الصراحة أنا مقتنعة جزئياً بكل كلام سمعتو عن دي الكليّة !! سواء من نت أقارب أصدقاء الخ..
يعني إذا أجمع الكل على شيء معيّن أكيد في شك نوعاً ما في دا الموضوع !
يعني بإختصار كل شي بيرفكت ماعدا الدراسة و النظام ؟
ممكن أطلب منّك طلب أخير لوسمحتي Sad !
ترا أنا مرة مابا أدخل دي الكلية بس أهلي ضاغطين عليا بشكل فظيع عشان أدخلها و خصوصاً إنها قريبة من بيتي !
ممكن تلخصيلي أهم النقاط اللي ممكن أقنع فيها أهلي بخصوص نوع دراسة الكلية و كيفيتها و اللخبطة في النظام و القرارات المفاجئة ؟
بس أنا مستغربة إنّي لما سألت هناك عن الخطة الدراسية .. قالولي إنها خلاص السنة دي أعتمدوها !!
و إذا تعرفي أول دفعة اتخرجت اتعينوا في وظائف كويسة و كدا ولا كيف ؟
و شكرااااااااااا مرررة ليكي تعّبتك معايا Very Happy انتظرك بفارغ الصبر
محا أنساكي من دعائي Sad ربي يسعدك و يوفقك

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
roro



عدد المساهمات : 295
تاريخ التسجيل : 22/09/2010

مُساهمةموضوع: رد: نظرتِي المبدئية عند زيارتي الأولى لكلية البترجي قبل يومين + استفسار نونو ;)   الأربعاء يونيو 13, 2012 8:15 am

العفو مابيننا والله والله يعافيكي
ايوه بصراحه كل شئ بيرفكت ماعدا النظام والخطط الدراسيه لكن دراسه كويسه والمشكله التانيه اللعب في الدرجات

والله شوفي مساوئها قليله مو مره كتيره
بس من القرارات المفاجاه لينا انهم كانو يبو التوفل ودحين طالبينو بعد السنه التحضيره لاول سنه
تاني شئ الاختبارات من الالمانيه الي يجو يدرسوكي اسبوعين بالزبط وبعدها يبدو دكاتره تانين يعني الشرح في جهه والاسئله في جهه
بس انتي لو تبي تقنعي اهلك قوليلهم لو ضمنت جامعه حكوميه فاهيا افضل الف في الميه بالصراحه
يعني كتير ممنا وانا اولهم لو ضمنت مقعدي في جامعه حكوميه والله ماجيت اهليه
ونسيت اقولك احنا في نص السنه قالولنا في اختبارين واحد اسمو اوسبي وواحد ورال الاورل دا شفوي والاوسبي للمعامل نختبر المعامل في كمبيوتر يعني دي الاتنين كنا معترضين عليها شويا
بس دكتور خالد ا تفهمنا وحزفلنا الاورل وخلاه السنه الجيه بازن الله


الخطه الدراسيه ممكن انحطت جديده بس احنا ماعندنا خطه دراسيه
اول دفعه اتخرجت السنه الي راحت والتانيه دي السنه ا ن شا ءالله بس هل اتعينو فالله اعلم لاني ماعرف احد منهم

الله يسعدك انتي كمانه وربي يخترلك الي فيلو الخير
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
نظرتِي المبدئية عند زيارتي الأولى لكلية البترجي قبل يومين + استفسار نونو ;)
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى طلاب و طالبات كلية البترجى الطبية :: منتدى المساعدة والمساندة :: منتدى الأسئلة والاستفسارات-
انتقل الى: